June 16, 2021

Sinhala News Line

Access all Sinhala News From one site

කරාපිටියේ කොරෝනා කරල ධම්මික පැණියේ දෙවන සංදර්ශනයක්



කරාපිටිය රෝහලේ වෛද්‍යවරු කිහිපදෙනෙක් එකතු වී කොරෝනා වෛරසයට ඖෂධයක් ලෙස කරලක් නිපදවා ඇති බව ප්‍රචාරය කිරීම ධම්මික පැණියේ දෙවන අවස්ථාව බව ශ්‍රී ලංකා රජයේ ආයුර්වේද වෛද්‍යවරුන්ගේ සංගමය පැවසුවේය.

අද (07) දින එම සංගමය විසින් කැඳවා තිබුණු මාධ්‍ය හමුවේදී එහි මාධ්‍ය ප්‍රකාශක වෛද්‍ය විමුක්ති ද සොයිසා මහතා සඳහන් කළේ කිසිම ආකාරයකින් එම ඖෂධය ආයුර්වේද දෙපාර්තම්නේතුවේ තාක්ෂණික කමිටුවේ අනුමැතියක් ලැබී නැති බවයි. 

කිසිම ඖෂධයක් වෛද්‍ය උපදෙස් නොමැතිව ලබා නොගත යුතු අතර බොහෝ දෙනෙකු නොදැනුවත්ව වුවද ශරීර තුළ බෝ නොවන රෝග පැවතිය හැකි හෙයින් එවැනි තත්ත්ව වලදී මෙවැනි ඖෂධ හරහා සිදුවන්නේ හානියක් බව සොයිසා මහතා කියා සිටියේය. 

වෘත්තීය ආචාර ධර්ම පවා නොතකා බටහිර වෛද්‍යවරු කිහිප දෙනෙක් විසින් දේශීය ඖෂධයක් නිපදවා මේ වන විටත් එය වෙළඳපොළට මුදා හැර ඇති නමුත් එවැනි අනුමැතියක් නොමැති ඖෂධයක් භාවිතා නොකරන ලෙසයි ඔහු ජනතාවගෙන් ඉල්ලා සිටියේ. 

මෙවැනි මාෆියා තුළින් සිදුවන්නේ ජනතාව නොමඟ ගොස් ඔවුන්ගේ මුදල්, කාලය මෙන්ම සෞඛ්‍යය ද අනතුරට හෙළා ගන්නා බව යැයිද වෛද්‍ය විමුක්ති ද සොයිසා මහතා පැහැදිලි කරන ලදී.

කොරෝනා සඳහා ලොව කොතැනක හෝ ආයුර්වේද හෝ බටහිර ඖෂධයක් නොමැති බවත් ඇත්තේ ප්‍රතිශක්තිකරණය ඇති කරන ඖෂධ පමණක් බවත් ඔහු තවදුරටත් සඳහන් කළේය.

මේ අතර ධම්මික පැණිය සම්බන්ධයෙන්ද  ශ්‍රී ලංකා රජයේ ආයුර්වේද වෛද්‍යවරුන්ගේ සංගමය ලෙස එය අසාර්ථක එකක් බවත් ඒ පසුපස දේශපාලන අරමුණක් පැවති බවත් සිය සංගමය පුන පුනා පැවසූ බවද සොයිසා මහතා කියා සිටියේය. 

දේශීය වෛද්‍ය අමාත්‍යවරයාගේ හා අමාත්‍යාංශයේ වගකීම් විරහිත ක්‍රියාකලාපය නිසා සිදු වූයේ මහජනතාවගේ කාලය,ශ්‍රමය, ධනය විනාශ වීමක් මෙන්ම කෑගල්ල ප්‍රදේශයේ සෞඛ්‍ය තත්ත්වය පවා අනතුරට හෙළුණු බව වෛද්‍යවරයා ප්‍රකාශ කරන ලදී. 

එහෙයින් එලෙස වගකීම් විරහිතව ක්‍රියා කර දේශීය වෛද්‍ය ක්‍රමයට කළ හානිය සම්බන්ධයෙන් ඔවුන් සියලු දෙනාගෙන් ප්‍රශ්න කළ යුතුව ඇති බවයි ඔහු වැඩිදුරටත් අවධාරණය කළේ.

ASK

 




Source link